«Барселона»нинг 19 ёшли ярим ҳимоячиси Марк Берналь ёзги трансфер ойнасида жамоани тарк этмайди. Бу ҳақда «Catalunya Radio» журналисти Рожер Арбуза хабар бермоқда.

Манбанинг маълумотига кўра, Берналь клуб ва мураббийлар штаби томонидан кўрсатилган ишончдан, айниқса ўтган мавсумнинг иккинчи ярмидаги муносабатдан жуда мамнун. Миш-мишларга кўра, хавбекка кўплаб таклифлар бўлган, аммо у «кўк-анорранглилар» лагерини тарк этиш ниятида эмас. Журналист Берналь ўз ҳаётидаги асосий клуб бўлган «Барселона»да қолишига 1000% кафолат бермоқда.

Марк Берналь — «Барселона» тарбияланувчиси. 2025/26 йилги мавсумда у барча мусобақаларда 33 та ўйин ўтказиб, 5 та гол урган ва 1 та голли узатмани амалга оширган.