Мадриднинг «Реал» клуби бош мураббий Жозе Моуриньо учун «Бенфика»га 15 миллион евро тўлайди, дейилади Португалия клубининг расмий баёнотида.
Аввалроқ, «Реал» 7 миллион ўрнига 15 миллион евро тўлаши ҳақида хабар берилган эди, чунки 63 ёшли мутахассиснинг шартномасидаги товон пули июнь ойидан бошлаб ошиб кетган. Мураббий тайинланишининг кечикаётгани «Реал»да 7 июнга белгиланган президентлик сайловлари билан боғлиқ.
«Бенфика»нинг маълум қилишича, «Реал» президентлигига номзод Флорентино Перес агар сайловда ғалаба қозонса, Жозе Моуриньо билан шартнома имзолаш нияти қатъий эканлигини билдирган. Воқеаларнинг бундай ривожида шартнома унда кўрсатилган бандга мувофиқ 15 миллион евро эвазига бекор қилинади», — дейилади «Бенфика» баёнотида.
Моуриньо — «Реал»нинг амалдаги президенти Флорентино Перес илгари сурган номзод ҳисобланади. Аввалроқ, унинг рақиби Энрике Рикельме агар сайловда ғалаба қозонса, «Арсенал» бош мураббийи Микель Артетани олиб келиш борасида келишувга эришгани ҳақида хабарлар тарқалган эди.
2025/26 йилги мавсумда «Реал» 86 очко жамғариб, Испания чемпионатида иккинчи ўринни эгаллади. Турнир ғолиблигини эса 94 очко билан «Барселона» қўлга киритди.
