Мадриднинг «Реал» клуби президентлигига номзод Энрике Рикельме ўз жамоасини клуб афсоналари билан кучайтиришда давом этмоқда.
4 июнь куни у собиқ дарвозабон Икер Касильяс ўз штабига қўшилганини расман эълон қилди. Бу ҳақда Рикельменинг ёрдамчилари томонидан тарқатилган баёнотда сўз боради. Маълумотларга кўра, агар у 7 июнь куни бўлиб ўтадиган сайловларда ғалаба қозонса, Касильяс клуб тузилмасида «биринчи даражали» лавозимлардан бирини эгаллайди. Унинг аниқ иш йўналиши ҳозирча ошкор қилинмаяпти.
Шу тариқа, Рикельме «капитанлар триоси» деб номланган жамоани шакллантирди. Унга кўра, Рауль Гонсалес Бланко спорт директори лавозимини эгаллаши мумкин, Фернандо Йерро «Реал» академияси директорига айланади, Касильяс эса клубнинг олий раҳбариятидан жой олади.
«Биз мадридча ДНКни «Реал»нинг қоқ марказига қайтармоқчимиз. Бизга ушбу клуб билан нафас оладиган инсонлар керак», — дея таъкидлади Рикельме.
Эслатиб ўтамиз, Икер Касильяс футболчилик фаолиятини якунлаганидан кейин ҳам «Реал» тузилмасида ишлаш тажрибасига эга эди. Унинг катта футбол сиёсатига функционер сифатида қайтиши кутилмаган, аммо рамзий маънога эга қадам бўлди.
