Бразилия терма жамоаси бош мураббийи Карло Анчелотти жамоанинг ЖЧ-2026 даги ғалабаси ҳақидаги саволга ижобий жавоб берди.
Тажрибали мутахассисга Бразилия терма жамоаси Жаҳон чемпионатида ғолиб чиқадими ёки йўқми, деган савол берилди.
«Менимча, ҳа, ғолиб бўлади. Мен футболчиларда юқори умид ва ишонч туйғусини шакллантиришни хоҳлайман. Олдинга қўйилган мақсад ва умидлар қанчалик юқори бўлса, мотивация ҳам шунчалик кучли бўлади», — дея маълум қилди Карло Анчелотти.
«Иқтидордан фақат аҳил ва жипслашган жамоа мавжуд бўлгандагина унумли фойдаланиш мумкин. Биз айнан мана шу жиҳат устида ишлашимиз керак ва буни албатта амалга оширамиз. Психологик омил жуда муҳим аҳамиятга эга: футболчилар худбинликдан йироқ, камтар бўлишлари, ягона мақсад йўлида тинимсиз меҳнат қилишлари ва жамоа муваффақиятига ўз ҳиссаларини қўшишлари лозим», — дея қўшимча қилди мутахассис.
Эслатиб ўтамиз, Жаҳон чемпионатининг гуруҳ босқичида Бразилия терма жамоаси Марокаш, Гаити ва Шотландия терма жамоаларига қарши баҳс олиб боради.
