«Ливерпуль» футболчиси Коди Гакпо клубнинг бош мураббий Арне Слот билан хайрлашиш қарорига муносабат билдирди. «Қизиллар» нидерландиялик мутахассиснинг истеъфосини май ойининг охирида эълон қилишган эди. Орадан ҳеч қанча вақт ўтмай, жамоанинг янги мураббийи Андони Ираола бўлиши маълум бўлди.
«Слотнинг истеъфога чиқарилгани ачинарли бўлди. Клуб ҳамма нарса тушунтирилган баёнот эълон қилди, бироқ футболчилардан бирортаси буни кутган эди деб ўйламайман. Албатта, мен ўша заҳоти мураббийга хабар йўллаб, икки йиллик биргаликдаги фаолият учун миннатдорчилик билдирдим», — деди Гакпо ESPNга берган интервьюсида.
«Ливерпуль» Англия чемпионатининг якунланган мавсумини бешинчи ўринда якунлади. Слот қўл остидаги дастлабки мавсумда эса мерсисайдликлар чемпионликни қўлга киритишган эди.
