Қозоғистон терма жамоаси бош мураббийи Талғат Байсуфинов Венгрияга қарши ўртоқлик учрашувидан кейин, натижадан қатъи назар, ўз лавозимини тарк этиши мумкин. Бу ҳақда журналист Александр Троицкий маълум қилди.

— ҚФФ раҳбариятида Байсуфинов ҳозирги пайтда терма жамоага керак бўлган мураббий эмас, деган фикр бор. Ҳатто молиялаштиришни қисқартириш ҳақида ҳам гап-сўзлар юрмоқда. Бу эса футболчиларнинг мукофот пулларига, спарринг рақиблар танловига ва хориж йиғиниларга таъсир қилиши мумкин.

Марат Омаров вазиятдан хабардор ва тартибсизликка йўл қўймайди, деб умид қиламан.

Мураббий масаласи, албатта, жамоавий тарзда ҳал қилиниши керак. Байсуфинов давридаги натижалар бўйича шахсан менда деярли савол йўқ.

Номзодларга келсак, мен аввал ҳам австралиялик Анге Постекоглу номини тилга олгандим. У ҚФФнинг ҳозирги бош котиби Мунн билан «Тоттенҳэм»да бирга ишлаган. Бу инсайд эмас, шахсий фикрим. Шунчаки тахмин қиляпман. Биласизлар, менинг бундай тахминларим кўп ҳолларда тўғри чиқади, — деб ёзди журналист ўзининг Telegram каналида.

Бугун Қозоғистон терма жамоаси Арманистон билан 1:1 ҳисобида дуранг ўйнади. 9 июнь куни эса миллий жамоа Венгрияга қарши майдонга тушади.

Эслатиб ўтамиз, Талғат Байсуфинов 2025 йил октябрь ойида учинчи марта Қозоғистон терма жамоаси бош мураббийи этиб тайинланган эди. Унинг қўл остида жамоа учта учрашув ўтказиб, бирортасида ҳам мағлуб бўлмади: Лихтенштейн 4:0 ҳисобида мағлуб этилди, Шимолий Македония (1:1) ва Бельгия (1:1) билан эса дуранг қайд этилди. Байсуфинов бундан аввал ҳам икки марта миллий жамоани бошқарган.