Франция очиқ чемпионати — “Ролан Гаррос” мусобақасининг аёллар ўртасидаги финалида россиялик теннисчи Мирра Андреева полшалик Мая Хвалинскаяни мағлуб этиб, фаолиятидаги илк “Катта дубулға” совринини қўлга киритди.

Парижда бўлиб ўтган ҳал қилувчи баҳсда 8-рақам остида таснифланган Андреева рақибини 6:3, 6:2 ҳисобида мағлуб этди. Хвалинская эса турнирнинг асосий тўрига саралаш босқичи орқали йўл олган эди.

19 ёшли Андреева фаолиятида илк бор “Катта дубулға” турнири ғолибига айланди.

Хвалинская эса Франция Очиқ чемпионати тарихида саралаш босқичидан ўтиб финалгача етиб келган илк теннисчига айланди. Бунгача “Катта дубулға” турнирларида бу натижани фақат британиялик Эмма Радукану қайд этган бўлиб, у 2021 йилда АҚШ Очиқ чемпионатида ғалаба қозонган эди.

Ҳозирда WTA рейтингида 8-ўринни эгаллаб турган Андреева учун бу яккалик баҳсларидаги олтинчи чемпионлик бўлди. Унинг “Ролан Гаррос”даги аввалги энг яхши натижаси 2024-йилдаги ярим финал эди. Ўша йили у Париж Олимпиадасида Диана Шнайдер билан жуфтлик баҳсларида кумуш медални қўлга киритган.

24 ёшли Хвалинская эса WTA рейтингида 114-ўринда бормоқда. У фаолияти давомида ҳали WTA турнирларида ғолиб чиқмаган. Роланд Гаррос якунларига кўра, полшалик теннисчи илк бор дунёнинг энг кучли 30 нафар теннисчиси қаторидан жой олади.

“Ролан Гаррос” мавсумдаги тўртта “Катта дубулға” турниридан иккинчиси ҳисобланади. Мусобақа грунт (қумли) қопламали кортларда ўтказилади ва соврин жамғармаси 61,7 миллион евродан ортиқни ташкил этади. Навбатдаги “Катта дубулға” турнири — “Уимблдон” 29 июндан 12 июлга қадар Лондонда бўлиб ўтади.