Мадриднинг «Реал» клуби ҳужумчиси Эндрик Бразилия терма жамоасининг Мисрга қарши ўртоқлик учрашувида энг яхши футболчи деб топилди.
19 ёшли футболчи танаффусдан сўнг захирадан майдонга тушди ва 52-дақиқада гол уриб, таблода якуний ҳисобни ўрнатди — 2:1. Финал ҳуштаги чалинганидан кейин ёш форвард учрашувнинг энг яхши ўйинчиси деб эътироф этилди.
Эндрик 2024 йилнинг 9 июнидан буён илк бор Бразилия терма жамоаси сафида гол уришни уддалади. Умумий ҳисобда унинг «пентакампеонлар» (беш карра жаҳон чемпионлари) сафидаги голлари сони 17 та учрашувда 4 тага етди. Иқтидорли бразилиялик футболчи якунланган мавсумнинг иккинчи ярмини Франциянинг «Лион» клубида ижарада ўтказди ва у ерда ўзини кўрсата олгани эвазига терма жамоанинг жаҳон чемпионати учун қайдномасидан жой олди.
