Мадриднинг «Реал» клуби ярим ҳимоячиси Жуд Беллингем Англия терма жамоаси таркиби ҳақидаги фикрлари билан ўртоқлашди. Шанба куни Томас Тухель шогирдлари Харри Кейннинг голи эвазига ўртоқлик учрашувида Янги Зеландия терма жамоасини мағлуб этишди (1:0).
«Биз таркибда тажриба ва ёшликнинг ажойиб уйғунлигини кўриб турибмиз. Жамоада янги футболчилар ҳам, анчадан бери терма жамоа шарафини ҳимоя қилиб келаётганлар ҳам бор. Кейн, Хендерсон, Стоунз ва Пикфорднинг тажрибаси бизга кўп нарса бериши мумкин. Бизнинг таркиб жуда кучли», — деди Беллингем ITV телеканалига берган интервьюсида.
Жаҳон чемпионатининг гуруҳ босқичида инглизларга Хорватия, Панама ва Гана терма жамоалари рақиблик қилади. Мундиал стартидан олдин «уч шерлар» Коста-Рикага қарши яна бир ўртоқлик учрашувида майдонга тушади.
