Бразилия терма жамоаси устози лавозимида ишлаётган италиялик мутахассис Карло Анчелотти Миср миллий жамоасига қарши ўтказилган ўртоқлик учрашувида ҳужумчи Эндрик кўрсатган ўйин ҳақида ўз фикрлари билан ўртоқлашди. Ушбу баҳсда ҳужумчи голлардан бирига муаллифлик қилди ва «селесао» 2:1 ҳисобида ғалаба қозонди.
«Эндрик — позицияни тўғри танлай оладиган кучли футболчи. У вазиятлардан унумли фойдаланишни билади. Терма жамоа учун у жуда муҳим ўйинчи, шу зайлда давом этиши керак. Шунингдек, биз учун Кунья ҳам муҳим аҳамиятга эга. Тўғри, у ҳужумни якунлашда Эндрикдек кучли бўлмаслиги мумкин, аммо ўйинни шакллантиришда жуда фаол», — дея Анчелоттининг сўзларини келтиради Globo.
Жаҳон чемпионати – 2026 гуруҳ босқичида Бразилия терма жамоаси Марокаш, Шотландия ва Гаити жамоаларига қарши майдонга тушади.
