Мадриднинг «Реал» клуби президенти сайловида ғалаба қозонган 79 ёшли функционер Флорентино Перес португалиялик мутахассис Жозе Моуриньонинг бош мураббий сифатида жамоага қайтишини маълум қилди.

«Биз дунёнинг энг яхши мураббийларидан бири, ҳақиқий мадридист — Жозе Моуриньони яна қарши олиш имкониятидан фахрланамиз», — деди Перес.

Унинг сўзларини журналист ва инсайдер Фабрицио Романо X ижтимоий тармоғида келтирган.

Эслатиб ўтамиз, Перес сайловда испаниялик тадбиркор Энрике Рикельмени ортда қолдириб, «Реал» президенти лавозимига қайта сайланди. У клубни 2030 йилгача бошқаради ва бу унинг мазкур вазифадаги кетма-кет саккизинчи муддати бўлади.

Жозе Моуриньо аввал ҳам 2010–2013 йилларда «Реал»ни бошқарган. Унинг қўл остида мадридликлар Испания чемпионати, Испания Кубоги ва Испания Суперкубогини қўлга киритган.

Ўтган мавсум якунига кўра, «қаймоқранглилар» бирорта ҳам соврин қўлга кирита олмаган эди.