Аргентина терма жамоасининг собиқ ҳужумчиси Серхио Агуэро «Атлетико» ва «Барселона» ўртасида танлов қилди. Форвард фаолияти давомида ҳар икки клубда ҳам тўп сурган.
«Мен «Атлетико» ва «Барселона»да ўйнаганман, лекин тўғрисини айтсам, «Барселона»ни чин дилдан севиб қолдим. Ҳозир «Атлетико»га қараганда кўпроқ «Барселона» мухлисиман.
Очиғини айтганда, юрагимда муаммолар бошланганидан бери футболни унчалик томоша қилмаётган эдим. Бироқ Ламин Ямал пайдо бўлганидан кейин менда яна ўйинларни кузатиш иштиёқи уйғонди. Ямалнинг ўйини менга жуда ёқади ва айнан у туфайли яна футбол кўришни бошладим. У мен ёшлигимда қила олмаган ишларни амалга оширмоқда», – деди Агуэро.
Эслатиб ўтамиз, Серхио Агуэро 2006 йилдан 2011 йилгача «Атлетико»да, 2021 йилда эса «Барселона»да фаолият юритган.
