Матбуотда Хулиан Альвареснинг «Атлетико»дан «Реал Мадрид»га ўтиши мумкинлиги ҳақида хабарлар пайдо бўлди, ваҳоланки оммавий ахборот воситалари футболчини анчадан бери «Барселона» билан боғлаб келаётган эди. 26 ёшли Альварес билан ҳамкорлик қилувчи агент Фернандо Идальго ушбу маълумотларга муносабат билдирди.
«Бу масала бўйича ҳеч ким биз билан боғлангани йўқ, бизда бу ҳақда ҳеч қандай маълумот мавжуд эмас», — дея Идальгонинг сўзларини келтиради The Touchline.
Нуфузли Transfermarkt портали Хулиан Альваресни 100 миллион еврога баҳоламоқда. Бироқ амалда «Атлетико Мадрид» форвард учун бундан анча юқори маблағ талаб қилиши аниқ.
Ортда қолган 2025/2026 йилги мавсумда Альварес барча мусобақаларда 49 та ўйинда майдонга тушиб, 20 та гол уришга муваффақ бўлди.
