ЖАР терма жамоаси 11 июнь куни «Ацтека» стадионида бўлиб ўтадиган Жаҳон чемпионати—2026 нинг очилиш учрашувида Мексикага қарши баҳс олиб боришга тайёр. Бу ҳақда жамоа бош мураббийи Ҳуго Брос маълум қилди.
Жанубий Африка жамоаси сўнгги ўртоқлик учрашувида Ямайка билан 1:1 ҳисобида дуранг ўйнади. Брос футболчилар ўз ўйинларини кучайтиришлари кераклигини тан олди, бироқ таркиб ҳали ҳам Пачукада жойлашган машғулот базаси шароитларига мослашаётганини таъкидлади.
«Мослашиб кетишимиз учун балки яна бир неча кун керак бўлар. Мен майдонда ўзлари истагандек бор кучини бера олмаган футболчиларни кўрдим. Бу, шубҳасиз, баландлик (кислород етишмовчилиги) туфайлидир. Пайшанба кунги ўйинга тайёр бўлишимизга ишончим комил», — дея Броснинг сўзларини келтирмоқда COSAFA сайти.
«Биз Мексикага қарши нима қилиш кераклигини биламиз. Улар тўпга эгалик қилганда ҳам, ўзимизда тўп бўлганда ҳам қандай ҳаракат қилишни яхши англаймиз. Сўнгги деталлар кейинги иккита машғулотимизда ишлаб чиқилади. Бутун диққат-эътиборимиз ушбу ўйинга қаратилган», — деди мураббий.
«Уларнинг (мексикалик футболчиларнинг) барчаси хавфли, бу жуда ҳаракатчан ва жипслашган ажойиб жамоа. Улар ҳақиқатан ҳам Жаҳон чемпиони бўлишни исташади. Буни уларнинг ўйинидан ҳам сезиш мумкин. Агар ижобий натижага эришмоқчи бўлсак, энг юқори даражамизни кўрсатишимиз керак. Улар жуда шаклланган жамоа».
Қизиқ жиҳати шундаки, 1986 йилги Жаҳон чемпионатида Ҳуго Брос Бельгия терма жамоаси сафида айнан шу стадионда ва айнан шу рақибга қарши старт ўйинида майдонга тушган эди.
