Германия терма жамоаси ярим ҳимоячиси Леон Горецка миллий жамоа сўнгги иккита Жаҳон чемпионатидаги муваффақиятсиз иштирок учун мухлислар олдида ўзини оқлашга қатъий қарор қилганини маълум қилди.
«Биз шу ёзда ҳамма нарсани тўғирламоқчимиз. Аввалги иккита Жаҳон чемпионати ҳақидаги хотиралар бизни безовта қилаётгани йўқ. Тўғри, мухлислар бизга бўлган ишончни бироз йўқотишди ва биз уларнинг ишончини қайта қозонишни жуда ҳам истаймиз. Бу мен ва бутун жамоа учун энг асосий мотивациядир», — деди Горецка ФИФА расмий сайтига берган интервьюсида.
Эслатиб ўтамиз, Германия терма жамоаси Жаҳон чемпионатидаги иштирокини Кюрасаога қарши ўйин билан бошлайди. "E" гуруҳидан ўрин олган ушбу учрашув 14 июнь куни бўлиб ўтади. Немислар турнирга 9 та ғалабадан иборат серия билан етиб келишмоқда.
