Уэльслик мутахассис Роб Эдвардс «Вулверхэмптон» бош мураббийлигидан бўшатилди. Бу ҳақда Англия клубининг расмий сайтида маълум қилинди.
43 ёшли мураббий жамоа бошқарувини 2025 йилнинг ноябрь ойида қўлга олган эди. Бироқ Эдвардс «бўрилар»ни Англия элитасида сақлаб қолиш вазифасини уддалай олмади — якунланган мавсумнинг 38 тури натижаларига кўра, жамоа турнир жадвалида сўнгги ўринни эгаллаб, Чемпионшипга равона бўлди.
Эдвардснинг истеъфоси инглиз матбуоти учун кутилмаган янгилик бўлди. Боиси, клуб раҳбарияти уэльслик мутахассисга жамоани қайта шакллантириш ва АПЛга қайтариш вазифасини ишониб топшириши кутилаётган эди.
Яқиндагина «Вулверхэмптон» трансфер бозорида фаоллик кўрсатиб, икки нафар тажрибали футболчи — ҳимоячи Киран Триппьер ва ҳужумчи Рауль Хименес билан шартнома имзолаган эди. Клуб янги мавсумни бошқа мураббий қўл остида бошлайдиган бўлди.
