Ҳужумкор ярим ҳимоячи Аллан Сен-Максимен фаолиятини океан ортида давом эттиради. 29 ёшли футболчи АҚШнинг «Шарлотт» клуби билан узоқ муддатли шартнома имзолаш борасида келишувга эришди.

Франциялик ўйинчи янги жамоасига эркин агент мақомида ўтмоқда. Сен-Максимен уч йиллик шартномага имзо чекади. Бу ҳақда таниқли инсайдер Фабрицио Романо хабар берди.

Якунланган мавсумда Аллан Франция чемпионатида «Ланс» шарафини ҳимоя қилди. У 10 та учрашувда майдонга тушиб, ўз ҳисобига 3 та гол ва 3 та голли узатмани ёздириб қўйди. Сен-Максимен фаолияти давомида «Ньюкасл», «Фенербахче», «Америка» ва «Ал-Аҳли» каби жамоаларда ўйнагани билан ҳам танилган.