Мадриднинг «Реал» клуби ҳужумчиси Килиан Мбаппе Франция терма жамоаси йиғини давомида «ПСЖ» футболчиларини УЕФА Чемпионлар лигаси-2025/2026 мавсумидаги ғалаба билан табриклаганини маълум қилди.
Турнир финалида парижликлар Лондоннинг «Арсенал» клубини мағлуб этган эди. Асосий вақт 1:1 ҳисобида якунланган бўлса, пенальтилар сериясида «ПСЖ» 4:3 ҳисобида устун келган.
«Албатта, мен Франция терма жамоасининг йиғинида бўлган "ПСЖ" футболчиларининг барчасини табрикладим. Улар ўтган мавсумда ажойиб ўйин кўрсатишди. Ҳозир "ПСЖ" ўзининг энг юқори даражасидаги формасида турибди», — деди Мбаппе. Унинг сўзларини машҳур журналист ва инсайдер Фабрицио Романо X ижтимоий тармоғида келтирди.
Таъкидлаш жоиз, «ПСЖ» учун мазкур ғалаба клуб тарихидаги кетма-кет иккинчи Чемпионлар лигаси соврини бўлди.
Мбаппе эса 2024 йилдан буён Мадриднинг «Реал» клуби шарафини ҳимоя қилиб келмоқда.













