Канада терма жамоаси бош мураббийи Жесси Марш об-ҳаво шароити Босния ва Герцеговинага қарши учрашувнинг ўтишига халақит бермайди, деган фикрни билдирди. Жамоалар 12 июнь куни Жаҳон чемпионати гуруҳ босқичининг 1-тури доирасида ўзаро куч синашади.

Эслатиб ўтамиз, бир кун аввал бўлиб ўтган Мексика — ЖАР учрашувини томоша қилиш пайтида, момақалдироқ хавфи туфайли Торонтодаги мухлислар фестивали (фан-зона) ярмида эвакуация қилинган эди.

«Шимолий Америкада барчамиз бунга ўрганганмиз. Бу Европа жамоалари учун иссиқ Жаҳон чемпионати бўлади. Мен 1994 йилги турнирни [АҚШдаги Жаҳон чемпионати] эслайман, у жуда иссиқ ўтган ва жамоаларга кучли таъсир қилган эди», — дея мураббийнинг сўзларидан иқтибос келтиради The Guardian нашри.

«Менимча, бизда Америка Кубоги (Copa America) ва КОНКАКАФ Олтин кубогида тўпланган тажриба кўринишидаги устунлик бор. Аммо бу нафақат жисмоний, балки руҳий синов эканлигига ҳам шубҳа йўқ. Биз бу билан танишмиз. Иссиқ бўлади, лекин биз тайёр бўламиз».

Торонтодаги стадионда ҳарорат 26 даражадан ошмаслиги кутилмоқда. Босния ва Канада ўртасидаги учрашув Тошкент вақти билан 13 июнга ўтар кечаси соат 00:00 да бошланади.