«Ювентус», «Интер», «Барселона», «Милан», «ПСЖ» ва «Манчестер Юнайтед» клубларининг собиқ ҳужумчиси Златан Ибраҳимович 2026 йилги жаҳон чемпионатида Хорватия терма жамоасини қўллаб-қувватлашини маълум қилди.
Златко Далич бошчилигидаги жамоа "L" гуруҳида Англия, Гана ва Панама терма жамоалари билан баҳс олиб боради. Эътиборли жиҳати шундаки, Златан футболчилик фаолияти давомида ўзи тўп сурган Швеция терма жамоасини эмас, айнан Хорватияни тилга олди.
— Қайси гуруҳ сизнинг эътиборингизни кўпроқ тортмоқда?
— "L" гуруҳи. Бу ерда Англия бор, Хорватия бор. Менинг хорват илдизларим мавжуд, шунинг учун бу турнирда айнан уларга мухлислик қиламан. Шунингдек, Гана ҳам бор — иқтидорли футболчиларга эга жамоа. Уларнинг нималарга қодирлигини кўрамиз. Панама ҳам иштирок этмоқда. Афсуски, менимча, ушбу гуруҳда у бошқалар учун «машқ объекти»га айланади.
Англия ва Хорватия биринчи ўрин учун кураш олиб боради, Гана эса уларга муаммо туғдириб, очко тортиб олиши мумкин, — деди Ибраҳимович Fox Sports эфирида.













