“ПСЖ” ҳужумчиси Усман Дембеле “Барселона”ни тарк этиб, тўғри иш қилган деб ҳисоблайди.

Франциялик футболчи 2017 йилдан 2023 йилгача каталонияликлар сафида тўп тепган, шундан сўнг парижликлар сафига кўчиб ўтган эди. Ватанига қайтиш форвард учун катта муваффақиятлар олиб келди: у уч йил ичида икки бор Чемпионлар лигасида ғолиб чиқди ва “Олтин тўп” соҳибига айланди.

“Менимча, мен тўғри қарор қабул қилганман. Ўшанда “Барселона”дан кетиш учун энг қулай вақт келганди деб ҳисоблайман. Ҳа, мен бу клубга жуда боғланиб қолганман ва болалигимдан унга мухлислик қиламан, лекин “ПСЖ”га ўтиш тўғри қадам эди”, — деди Дембеле Marca нашрига берган интервьюсида.

Якунланган мавсумда 29 ёшли футболчи Луис Энрике қўл остидаги жамоа сафида 40 та учрашувда майдонга тушиб, 20 та гол ва 11 та голли узатмани ўз ҳисобига ёздириб қўйди.