Халқаро футбол федерацияси Гвадалахарада бўлиб ўтган Жанубий Корея ва Чехия (2:1) терма жамоалари ўртасидаги ўйиндан сўнг хорижий матбуотда тарқалган танқидий хабарларга муносабат билдирди. Стадионда бўш ўриндиқлар кўзга ташланганига қарамай, ўйиннинг расмий ташриф буюрувчилар сони 44 985 нафар деб эълон қилинган эди.
ФИФА ўз баёнотида қуйидагиларни таъкидлади:
«Ташриф буюрувчилар ҳақидаги расмий маълумотлар ўйин давомида стадиондаги бўш ўриндиқларни визуал баҳолашга эмас, балки сканердан ўтказилган чипталар ва стадион ҳудудида бўлган томошабинларнинг аниқ сонига асосланади.
ФИФА эълон қилинган барча маълумотлар тасдиқланган оператив маълумотларга асосланишини таъминлаш учун стадион раҳбарияти ва чипта сотиш бўйича масъул гуруҳлар билан яқиндан ҳамкорлик қилмоқда.
Шуни қайд этиш жоизки, Гвадалахарадаги ўйин вақтида баъзи чипта эгалари ўз ўриндиқларида ўтирмасдан, фойе қисмида турганлиги кузатилган», — дейилади ФИФА расмий баёнотида.
