«Реал» собиқ бош мураббийи Хулен Лопетеги фаолиятидаги энг оғриқли воқеалардан бири — 2018 йилда «қироллик клуби»дан истеъфога чиқарилгани ҳақида тўхталиб ўтди. Бу воқеа у тайинланганидан бир неча ой ўтиб содир бўлган эди.
«Бошланиши осон бўлмаганди: кўплаб футболчилар Жаҳон чемпионатидан сўнг жамоа ихтиёрига кечикиб қайтишди. Бундан ташқари, ўша йили Криштиану Роналду жамоани тарк этганди. Шунга қарамай, биз мавсумни яхши бошладик. Менда кийиниш хонасининг ишончи бор эди ва биз янги жамоа тузиб, тўғри йўналишда кетаётган эдик», — дея мутахассиснинг сўзларини El Mundo нашри келтиради.
Бироқ бир қатор муваффақиятсиз ўйинлар вазиятни тез фурсатда ўзгартириб юборган: «Кейин шундай икки ҳафталик давр бўлдики, унда панд бериши мумкин бўлган барча нарса панд берди. Футбол шунақа. Москвадаги автогол, Исконинг аппендицит бўлиши... Биз "Барселона"дан 7 очкога ортда қолдик ва шундан сўнг мен жамоани тарк этдим».
Лопетегининг таъкидлашича, у кетганидан кейинги натижалар клубда анча чуқурроқ муаммолар борлигини исботлаган: «Кейинчалик Жаҳон чемпионатининг таъсири сезила бошлади. Масалан, Модрич жуда чарчаган ҳолда қайтганди. Жамоа ортда қолиб кетди, якунда эса мавсум бундан ҳам ёмонроқ тугади — очколар фарқи янада катталашди ва Чемпионлар лигасида "Аякс"дан мағлубият қабул қилиб олинди».
Эслатиб ўтамиз, Хулен Лопетеги ҳозирги вақтда Қатар терма жамоасини бошқармоқда ва жамоани ЖЧ-2026 турнирига бошлаб келди.
