Мадриднинг «Реал» клуби марказий ҳимоячиси Антонио Рюдигер Германия терма жамоасининг асосий таркибидаги ўрнини йўқотгани борасидаги саволга жавоб берди.
33 ёшли футболчи ЖЧ-2026 гуруҳ босқичи 1-туридан ўрин олган Кюрасаога қарши учрашувнинг (7:1) 73-дақиқасида, таблода 5:1 ҳисоби ёниб турган маҳал захирадан майдонга тушди. Қолган вақт ичида Юлиан Нагельсманн шогирдлари яна иккита гол уришга муваффақ бўлишди.
«Терма жамоадаги ролим? Мен мураббийнинг қарорини қабул қиламан ва ҳурмат қиламан. Менда улкан тажриба бор, шу сабабли майдондан ташқарида ҳам жамоага фойдам тегиши мумкин. Аммо майдонга туширилган ҳар бир вазиятда берилган имкониятдан максимал даражада фойдаланишга мажбурман», — деди Рюдигер DAZN телеканалига берган интервьюсида.
Кюрасао билан баҳсда Германия терма жамоасининг марказий ҳимоядаги асосий жуфтлигини Нико Шлоттербек ва Жонатан Та ташкил этди.
