Мадриднинг «Реал» клуби ва Франция терма жамоаси ярим ҳимоячиси Орельен Тчуаменига жамоадоши Федерико Вальверде билан содир бўлган можароли вазият ҳақида савол берилди.
Май ойининг бошида кийиниш хонасида француз ва уругвайлик футболчилар ўртасида тўқнашув содир бўлгани, бунинг натижасида Вальверде бошидан жароҳат олгани ҳақида хабарлар тарқалган эди. Франция терма жамоасининг ЖЧ-2026 даги Сенегалга қарши илк ўйини олдидан журналистлар ўша воқеани ёдга олишди ва Тчуаменидан шов-шувли тўқнашувдан сўнг Вальверде билан алоқада бўлиб тургани ёки йўқлигини сўрашди.
«Ҳа, албатта. Одамлар ўртамизда ҳеч қандай муаммо йўқлигини тушуниб етадиган вақт келди. Кийиниш хонасида кўп нарса содир бўлиб туради. Вальверде сафга қайтганида, иккаламиз қўл бериб кўришдик ва биргаликда ишлашда давом этяпмиз», — дея матбуот анжуманида таъкидлади 26 ёшли ярим ҳимоячи.
Франция ва Сенегал терма жамоалари ўртасидаги учрашув сешанба куни Тошкент вақти билан соат 00:00 да бўлиб ўтади.
