«Манчестер Юнайтед» собиқ бош мураббийи Рубен Аморим бундан бир неча йил аввал «Милан»ни бошқариш истаги борлиги ҳақида очиқчасига гапирган эди. Унинг 2017 йилда Португалиянинг Expresso нашрига берган интервьюсида айтган сўзлари, Италия клубига эҳтимолий тайинланиши ҳақидаги хабарлар фонида яна кун тартибига қайтди.
Ўша пайтда мураббийлик фаолиятини эндигина бошлаётган Аморим ўзининг футболчилик давридаги орзуларини ёдга олган эди:
«Болалигимда «Бенфика» ва «Милан» ўйинларини томоша қилишни яхши кўрардим. «Милан» таркибида Мальдини, Барези, Гуллит, Райкард, Савичевичлар тўп сурган учрашувлар муҳрланган кассеталар ҳали ҳам ёдимда. Болаликдаги орзум «Бенфика» ва «Милан»да ўйнаш эди. «Бенфика» футболчисига айланиб, орзумнинг бир қисмини амалга оширдим. Энди эса «Милан»да мураббий бўлишим керак», — деган эди у ўшанда табассум билан.
Сўнгги маълумотларга кўра, томонлар ўртасидаги музокаралар якуни палласига яқинлашган ва тез орада мутахассиснинг тайинлангани расман эълон қилиниши мумкин.
