«Фиорентина» ва Италия терма жамоаси ҳужумчиси Мойзе Киннинг Флоренциядаги уйи тунаб кетилди. Номаълум шахслар Кампо-де-Марте туманида жойлашган хонадонга бинонинг орқа томонидан кириб, соатлар ва заргарлик буюмларини ўғирлашган, деб хабар бермоқда Corriere dello Sport.
Дастлабки зарар миқдори 300 минг еврога баҳоланмоқда. Қайд этилишича, жиноятчилар профессионал тарзда ҳаракат қилишган ва қимматбаҳо буюмлар қаерда турганини олдиндан билишган. Воқеа жойига карабинерларнинг илмий суриштирув бўлими мутахассислари етиб келган. Улар хонадонни кўздан кечириб, кузатув камераларидаги ёзувларни олишган. Тергов воқеани олдиндан режалаштирилган ўғрилик сифатида кўриб чиқмоқда.
Жиноят содир этилган вақтда Кин Италиядан ташқарида бўлган. У қайтиб келганидан сўнг, ўғирланган буюмларнинг аниқ рўйхатини тузиш ва зарарни якуний баҳолаш учун полицияга чақирилади. Аввалроқ худди шу бинода «Фиорентина»нинг собиқ ҳимоячиси Никола Миленкович яшаган.
