Германиялик марказий ҳимоячи Антонио Рюдигер Мадриднинг «Реал» клубида қоладиган бўлди.
«Қаймоқранглилар» матбуот хизмати 33 ёшли футболчи билан меҳнат шартномаси узайтирилганини расман эълон қилди. Янги келишув 2027 йилнинг 30 июнига қадар мўлжалланган.
Рюдигер 2022 йилдан буён «Реал» шарафини ҳимоя қилиб келмоқда. Якунланган клуб мавсумида у барча мусобақаларни ҳисобга олган ҳолда 26 та учрашувда майдонга тушди ва битта гол уришга муваффақ бўлди.
Айни пайтда Рюдигер Германия терма жамоаси сафида ЖЧ-2026 мусобақасида иштирок этмоқда. Кюрасаога қарши кечган 1-тур учрашувида (7:1) у захирадан майдонга тушиб, 17 дақиқа ҳаракат қилди.
Баҳорда Рюдигерни ўз сафига қўшиб олмоқчи бўлган клублар қаторида Италиянинг «Ювентус» жамоаси борлиги ҳақида хабар берилган эди.
