Британлик актёр Том Холланд Мадридга Марвелнинг Ўргимчак-одам ҳақидаги янги фильми тарғиботи учун ташриф буюрди ва «Барселона» вингери Ламин Ямални «суперқаҳрамон роли учун идеал номзод» деб атади. Бу ҳақда Mundo Deportivo нашри хабар бермоқда.
Терма жамоанинг Жаҳон чемпионатидаги иштирокини кузатиш учун ташкил этилган Испания фан-зонасидаги интервью чоғида Холландга машҳур суперқаҳрамон ролини қайси футболчи ўйнаши мумкинлиги ҳақида савол берилди. Унинг жавоби «Ламин Ямал» бўлди. Актёр ушбу ёш истеъдод эгаси «ўзининг тезлиги, маҳорати ва майдонда чаққон ҳаракат қила олиши туфайли Ўргимчак-одам ролига энг муносиб номзод» эканини таъкидлади.
Суҳбат давомида Мадриднинг «Атлетико» клуби ҳужумчиси Хулиан Альварес ҳам тилга олинди. Аргентиналик футболчи «Барселона» спорт раҳбариятининг ҳужум чизиғини кучайтириш учун асосий мақсадларидан бири бўлиб турибди. Альварес гол урганидан кейин баъзида Ўргимчак-одамнинг ишорасини тақлид қилиши билан танилган. Актёр аргентиналик форвардни ўзининг фэнтези-лигасидаги жамоасига қўшиб олганини ва уни ҳам «суперқаҳрамон либосини кийиш учун ажойиб номзод» деб ҳисоблашини қўшимча қилди.
