Britanlik aktyor Tom Xolland Madridga Marvelning O‘rgimchak-odam haqidagi yangi filmi targ‘iboti uchun tashrif buyurdi va «Barselona» vingeri Lamin Yamalni «superqahramon roli uchun ideal nomzod» deb atadi. Bu haqda Mundo Deportivo nashri xabar bermoqda.

Terma jamoaning Jahon chempionatidagi ishtirokini kuzatish uchun tashkil etilgan Ispaniya fan-zonasidagi intervyu chog‘ida Xollandga mashhur superqahramon rolini qaysi futbolchi o‘ynashi mumkinligi haqida savol berildi. Uning javobi «Lamin Yamal» bo‘ldi. Aktyor ushbu yosh iste’dod egasi «o‘zining tezligi, mahorati va maydonda chaqqon harakat qila olishi tufayli O‘rgimchak-odam roliga eng munosib nomzod» ekanini ta’kidladi.

Suhbat davomida Madridning «Atletiko» klubi hujumchisi Xulian Alvares ham tilga olindi. Argentinalik futbolchi «Barselona» sport rahbariyatining hujum chizig‘ini kuchaytirish uchun asosiy maqsadlaridan biri bo‘lib turibdi. Alvares gol urganidan keyin ba’zida O‘rgimchak-odamning ishorasini taqlid qilishi bilan tanilgan. Aktyor argentinalik forvardni o‘zining fentezi-ligasidagi jamoasiga qo‘shib olganini va uni ham «superqahramon libosini kiyish uchun ajoyib nomzod» deb hisoblashini qo‘shimcha qildi.