Миланнинг «Интер» клуби ярим ҳимоячи Кёртис Джонснинг трансфери борасида «Ливерпуль» билан музокараларни бошлади ва инглиз клубига илк расмий таклифини юборди. Бу ҳақда Football Italia нашри хабар бермоқда.
«Нерадзурри» 25 ёшли хавбек учун 20 миллион евро тўлашга тайёр. Бироқ бу сумма ҳозирча ўз тарбияланувчисини 30 миллион еврога баҳолаётган «Ливерпуль» раҳбариятини қониқтирмаяпти.
«Интер»нинг Джонсга бўлган қизиқиши янгилик эмас. Миланликлар футболчини шу йилнинг январь ойидаёқ сотиб олишга уриниб кўришган эди, энди эса янги мавсум бошлангунга қадар келишувни якунлаш умидида музокараларга қайтишди. Инглиз ярим ҳимоячисининг «Ливерпуль» билан шартномаси 2027 йилнинг июнигача амал қилади, бироқ футболчининг ўзи, хабарларга кўра, Италияга кўчиб ўтиш вариантини инкор этмаяпти.
«Интер» раҳбарияти келишувга эришиш учун таклиф қилинаётган суммани оширишга тўғри келишини тушуниб турибди. Клуб яқин кунларда «Ливерпуль» билан музокараларни давом эттириш ниятида.
