Ўзбекистон миллий терма жамоаси футбол бўйича жаҳон чемпионатидаги тарихий иштирокини Колумбияга қарши учрашув билан бошлайди. Вакилларимиз АҚШнинг Атланта шаҳрида расмий ўқув-машғулот йиғинларини якунлаб, илк ўйин бўлиб ўтадиган Мехико шаҳрига йўл олишга ҳозирлик кўрмоқда.
Бироқ мусобақа старти олдидан миллий жамоамиз сафида жиддий йўқотиш юз берди. Маълумки, жамоа ярим ҳимоячиси Жалолиддин Машарипов узоқ муддат ўйин амалиётисиз қолиб кетгани сабабли сўнгги машғулотларда тўлиқ ҳажмда иштирок эта олмаётган эди. Терма жамоа тиббий штаби футболчини қисқа муддатда сафга қайтариш ва тиклаш мақсадида барча зарур чораларни кўриб, уни индивидуал дастур асосида шуғуллантирди.
Ўтказилган тиббий текширувлар таҳлили якунида барча ҳужжатлар ФИФА тиббий қўмитасига тақдим этилди. Қўмита мавжуд ҳолатни батафсил ўрганиб чиқиб, ўзбекистонлик футболчининг жароҳати сабаб жаҳон чемпионатида иштирок эта олмаслигини расман маълум қилди. Шу муносабат билан, Машариповнинг ўрнига якуний рўйхатга ҳужумчи Русланбек Жиянов киритилди.













