Кюрасао миллий терма жамоаси футбол бўйича Жаҳон чемпионатлари тарихида ўзига хос рекорд ўрнатди. У мундиалда иштирок этган энг кам аҳолига эга мамлакат сифатида қайд этилди.
Бу ҳақда Guinness World Recordsнинг Х (Twitter)даги расмий аккаунти маълум қилди. Ташкилот вакиллари Кюрасао футбол федерацияси президенти Гилберт Мартинага расмий рекорд сертификатини топширган.
«Биз Кюрасао футбол федерацияси президенти Гилберт Мартинага Жаҳон чемпионатига йўл олган энг кам аҳолига эга давлат рекорди учун сертификатни топширдик — 156 115 нафар аҳоли», — дейилади хабарда.
Кюрасао терма жамоаси тарихда биринчи марта Жаҳон чемпионатига йўл олди ва шу орқали аввалги рекордни янгилади. Илгари бу кўрсаткич Исландия миллий терма жамоасига тегишли эди (ЧМ-2018).
Жаҳон чемпионати — 2026 АҚШ, Канада ва Мексикада ўтказилмоқда. Бу сафар турнир тарихида биринчи марта 48 та терма жамоа иштирок этмоқда.













