Франция терма жамоаси ҳимоячиси Дайо Упамекано Сенегалга қарши ЖЧ-2026 учрашуви якунланганидан сўнг ўз фикрларини билдирди. Дидье Дешам шогирдлари 3:1 ҳисобида ғалаба қозонишди.
«Бу ёқимли. Биз 3 очкони қўлга киритиш учун қўлимиздан келган барча ишни қилдик. Бу ҳақиқий жанг бўлишини билардик. Икки хил қиёфа намойиш этдик, деб айтмаган бўлардим. Биз биринчи бўлимда ҳам, иккинчи бўлимда ҳам вазиятлар яратдик. Уларда чарчоқ ёки бўшашиш ҳолати кузатилиши мумкинлигини билардик.
Сенегалга қарши ўйнаш доимо қийин, улар Африка чемпионлари ҳисобланишади. Уларни табриклайман, бу жуда кучли жамоа. Таркибда кичик ўзгаришлар бўлди. Мураббий бизга бўшашмасликни айтди. Диққатни сақлаб қолиш учун ҳамма нарсани қилдик. Захирадан майдонга тушганлар, мисол учун Баркола, ўйинга жуда яхши киришиб кетишди», — дея футболчининг сўзларини келтиради RMC Sport.
Франциянинг турнирдаги кейинги рақиби Ироқ терма жамоаси бўлади. Ўйин 23 июнь куни бўлиб ўтади.
