«Париж» клуби агар Антуан Комбуаре билан хайрлашадиган бўлса, «Челси»нинг собиқ бош мураббийи Лиам Росеньор билан шартнома имзолаш имкониятини кўриб чиқмоқда. Бу ҳақда Foot Mercato нашри ёзмоқда.
Комбуаренинг «Париж» билан амалдаги шартномаси расман 2027 йилда якунига етади. Мураббий ўз келишувини 2028 йилгача узайтиришни истамоқда, бироқ бу борада клуб билан келиша олмаяпти. Ушбу вазият «Париж»ни муқобил вариантларни кўриб чиқишга мажбур қилди ва улардан бири Лиам Росеньор номзодига бориб тақалмоқда. Яқиндагина L'Equipe нашри Росеньор «Челси»даги муваффақиятсиз даврдан кейин мураббийлик фаолиятида танаффус олмоқчи бўлгани ҳақида хабар берган эди.
Якунланган мавсум натижаларига кўра, «Париж» Франция Лига 1 мусобақасида 11-ўринни эгаллади.
