Германия терма жамоасининг собиқ ҳужумчиси Мирослав Клозе Аргентина терма жамоаси етакчиси Лионель Месси жаҳон чемпионатларидаги голлар сони бўйича унинг рекордини такрорлагани ҳақида фикр билдирди.
Маълумки, Месси ЖЧ-2026 гуруҳ босқичининг 1-турида Жазоирга қарши баҳсда (3:0) хет-трик қайд этди. Шу тариқа, аргентиналик юлдузнинг мундиаллардаги голлари сони 16 тага етди ва у бу кўрсаткич бўйича Клозега тенглашди.
«Мессининг мени голлар сони бўйича қувиб етганидан ҳеч қандай эътирозим йўқ. Рекордлар янгиланиши учун яратилади. Агар буни Месси уддаласа, мен бундан фақат хурсанд бўламан. Мен доимо Мессининг катта мухлиси бўлганман. У — ҳақиқий даҳо», — деди Клозе.
Жаҳон чемпионатлари тарихидаги энг яхши тўпурарлар рўйхатида кейинги ўринларда бразилиялик афсонавий ҳужумчи Роналдо (15 та гол), германиялик Герд Мюллер ва Франция терма жамоасининг амалдаги ҳужумчиси Килиан Мбаппе жой олган. Мюллер ва Мбаппе ҳисобида 14 тадан гол мавжуд.













