Испания терма жамоаси тиббий штаби вингер Ламин Ямалда жароҳатнинг қайта такрорланиш хавфи юқори экани ҳақида огоҳлантирди.

ЖЧ-2026 гуруҳ босқичи 1-туридан ўрин олган Кабо-Вердега қарши баҳсда (0:0) футболчи майдонда 20 дақиқа ҳаракат қилди. У 70-дақиқада захирадан ўйинга қўшилган бўлса-да, шифокорлар унга имкон қадар камроқ ўйин вақти беришни тавсия қилган.

Манба маълумотига кўра, 22 апрелдан бери мушак жароҳатидан тўлиқ тикланмаган Ямалнинг юкламасини минимал даражада ушлаш бўйича тавсия берилган. Бироқ ўйин давомида вазият тақозоси билан футболчи режалаштирилганидан кўпроқ вақт майдонда қолди. Шу сабабли бош мураббий Луис де ла Фуэнте штаби ва тиббий хизмат ўртасида доимий маслаҳатлашувлар бўлиб турган.

Қайд этилишича, гап оғриқ ҳисси ҳақида эмас, балки жароҳатнинг қайта юз бериш хавфи ҳақида кетмоқда.

Ямал Саудия Арабистонига қарши 21 июнь куни бўлиб ўтадиган навбатдаги учрашувда иштирок этиш ниятида. Унинг қанча вақт майдонда ҳаракат қилиши эса тиббий кўрсатмалардан келиб чиққан ҳолда ҳал этилади.