Чехия терма жамоаси бош мураббийи Мирослав Коубек ЖЧ-2026 2-туридан ўрин олган ЖАРга қарши ўйин олдидан ОАВга интервью берди. Мусобақанинг 1-турида Чехия Жанубий Кореяга (1:2), ЖАР эса Мексикага (0:2) имкониятни бой берган эди.

«ЖАР Мексикага қарши ўйинда ғайриоддий услубни танлади. Бу ўзига хос тактик схема эди, ҳозир ҳам худди шу нарсани кўрамиз деб ўйламайман. Улар бизга қарши бироз бошқачароқ стратегия асосида ҳаракат қилишларини кутяпман», — деди Коубек ФИФА сайтига берган интервьюсида.

Жанубий Корея билан ўйинда Чехия терма жамоаси бўй устунлигидан фаол фойдаланиб, асосий урғуни стандарт вазиятларга қаратган эди. Коубек ЖАРга қарши баҳсда ҳам ушбу ёндашув сақланиб қолиши ёки йўқлигини сир тутди.

«Бизда ҳақиқатан ҳам баланд бўйли футболчилар бор, лекин майдонга энг новча ўйинчиларни тушириш — бу гигантларга айланамиз дегани эмас. Таркиб антропометрия нуқтаи назаридан худди шундай қоладими-йўқми, буни кўрамиз. Бу сюрприз бўла қолсин», — деди мутахассис.

Чехия ва ЖАР учрашуви 18 июнь куни бўлиб ўтади ва Тошкент вақти билан соат 21:00 да бошланади.