Chexiya terma jamoasi bosh murabbiyi Miroslav Koubek JCH-2026 2-turidan o‘rin olgan JARga qarshi o‘yin oldidan OAVga intervyu berdi. Musobaqaning 1-turida Chexiya Janubiy Koreyaga (1:2), JAR esa Meksikaga (0:2) imkoniyatni boy bergan edi.

«JAR Meksikaga qarshi o‘yinda g‘ayrioddiy uslubni tanladi. Bu o‘ziga xos taktik sxema edi, hozir ham xuddi shu narsani ko‘ramiz deb o‘ylamayman. Ular bizga qarshi biroz boshqacharoq strategiya asosida harakat qilishlarini kutyapman», — dedi Koubek FIFA saytiga bergan intervyusida.

Janubiy Koreya bilan o‘yinda Chexiya terma jamoasi bo‘y ustunligidan faol foydalanib, asosiy urg‘uni standart vaziyatlarga qaratgan edi. Koubek JARga qarshi bahsda ham ushbu yondashuv saqlanib qolishi yoki yo‘qligini sir tutdi.

«Bizda haqiqatan ham baland bo‘yli futbolchilar bor, lekin maydonga eng novcha o‘yinchilarni tushirish — bu gigantlarga aylanamiz degani emas. Tarkib antropometriya nuqtai nazaridan xuddi shunday qoladimi-yo‘qmi, buni ko‘ramiz. Bu syurpriz bo‘la qolsin», — dedi mutaxassis.

Chexiya va JAR uchrashuvi 18 iyun kuni bo‘lib o‘tadi va Toshkent vaqti bilan soat 21:00 da boshlanadi.