Ўзбекистон миллий терма жамоаси ярим ҳимоячиси Аббосбек Файзуллаев Жаҳон чемпионати гуруҳ босқичининг 1-турида Колумбия дарвозасига киритилган тарихий голдан сўнг қисқа интервью берди. Иқтидорли футболчи ушбу голини кимга атаганини айтиб ўтди.
Ўйиндан кейинги интервью чоғида журналистнинг “Киритган голингизни кимга бағишладингиз?” деган саволига Аббосбек шундай жавоб берди:
“Бу голни, аввало, оиламга ҳамда бўлажак рафиқамга бағишлайман”.
Шундан сўнг, мухбир қизиқиш билан “У сизга аллақачон табрик ёзишга улгурдими?” деб сўраганда, футболчи табассум билан “Бу сир”, дея жавоб қайтарди.
Суҳбат якунида журналистнинг “Энди аниқ уйланишингиз керак экан”, деган ҳазиломуз луқмасига Файзуллаев қисқа қилиб: “Тез орада”, деб жавоб берган.
Эслатиб ўтамиз, Колумбияга қарши кечган учрашувнинг (1:3) 61-дақиқасида Файзуллаев бош билан аниқ зарба йўллаб, Ўзбекистон терма жамоасининг мундиаллар тарихидаги дастлабки голига муаллифлик қилган эди.













