ЖЧ-2026 мусобақаси "А" гуруҳи 2-туридан ўрин олган Чехия ва Жанубий Африка Республикаси терма жамоалари ўртасидаги учрашув якунланди. АҚШнинг Атланта шаҳридаги «Мерседес-Бенц Стэдиум» аренасида бўлиб ўтган баҳсни америкалик ҳакам Тори Пенсо бошқариб борди. Ўйин 1:1 ҳисобида дуранг билан тугади.

Учрашувнинг 6-дақиқасида ярим ҳимоячи Михал Садилек Чехия терма жамоасини ҳисобда олдинга олиб чиқди. 83-дақиқада эса ҳакам чехияликлар жарима майдонида қўл билан ўйин қайд этиб, пенальти белгилади. Тебохо Мокоена 11 метрли жарима зарбасини аниқ амалга ошириб, ҳисобни тенглаштирди.

"А" гуруҳининг 1-турида Чехия Жанубий Кореяга 1:2 ҳисобида мағлуб бўлган эди. ЖАР эса турнирдаги илк учрашувида Мексикага 0:2 ҳисобида имкониятни бой берганди.

Гуруҳ босқичининг сўнгги турида Чехия Мексикага қарши майдонга тушади. Жанубий Африка Республикаси эса Жанубий Корея билан баҳс олиб боради.

Жаҳон чемпионати–2026. А гуруҳи, 2-тур
Чехия — ЖАР — 1:1
Голлар: Садилек, 6 (1:0), Мокоена, 83-пенальти (1:1).