Шотландия терма жамоаси бош мураббийи Стив Кларк ЖЧ-2026 2-туридан ўрин олган Марокашга қарши учрашув олдидан матбуот анжуманида иштирок этди. Мазкур ўйин 20 июнга ўтар кечаси, Тошкент вақти билан соат 03:00 да бошланади.

«Бўлажак учрашув қанчалик қийин кечиши борасида ҳеч қандай хомхаёлга берилаётганимиз йўқ. Марокаш ўтган Жаҳон чемпионатида ярим финалгача етиб борган эди ва менинг фикримча, бу жамоа ҳозир янада кучайган. Бу бизни қандай баҳс кутаётганидан дарак беради», — деди Кларк.

Мураббий ўз жамоаси курашга тайёрлигини ва Гаити устидан қозонилган ғалабадан сўнг ижобий кайфиятни сақлаб қолаётганини таъкидлади. Маълумот учун, бу Шотландиянинг йирик турнирлардаги охирги 30 йил ичидаги илк ғалабаси бўлди.

«Футболчилар ўзларини жуда яхши ҳис қилишмоқда. Улар ғалаба қозонишни исташганди ва буни уддалашди. Энди эса навбатдаги қадамни ташлаб, қолган ўйинларда ҳам керакли натижага эришишни хоҳлаймиз».

Биринчи турдан сўнг Шотландия ҳисобида 3 очко мавжуд. Бразилия ва Марокашда 1 тадан очко бор, Гаити эса ҳозирча очко тўплай олмади.