АПЛнинг икки клуби «Марсель» ҳужумчиси Мэйсон Гринвудга қизиқиш билдирмоқда. Бу ҳақда L’Équipe нашри хабар бермоқда.

«Манчестер Юнайтед»нинг собиқ футболчисини сотиб олиш имкониятларини «Арсенал» ва «Тоттенхэм» клублари кўриб чиқишга тайёр. Шунингдек, Гринвудга Италиянинг «Рома» клуби ҳам даъвогарлик қилмоқда.

Манба берган хабарга кўра, Франция клуби лигининг молиявий талаблари сабабли ушбу ёзда футболчиларини сотишга мажбур бўлмоқда ва айнан 24 ёшли форвард таркибдаги энг қимматбаҳо актив ҳисобланади. «Марсель» Гринвудни тахминан 80 миллион еврога баҳоламоқда. «Манчестер Юнайтед» эса аввалги шартномадаги қайта сотиш банди туфайли трансфер суммасининг 40 фоизини қўлга киритиши мумкин.

Якунланган мавсумда Гринвуд клуб миқёсидаги 45 та учрашувда майдонга тушиб, 26 та гол ва 11 та голли узатмага муаллифлик қилди.