Япония терма жамоаси устози Ҳажиме Мориясу Жаҳон чемпионати — 2026 гуруҳ босқичи доирасида Тунис терма жамоасига қарши кечган баҳсдан сўнг ўз фикрлари билан ўртоқлашди.
«Биз учрашувга жуда яхши тайёргарлик кўрган эдик ва майдонда тажовузкор ҳаракат қилдик. Тўғри тузилган ўйин режаси туфайли жамоамиз ўз салоҳиятини тўлиқ намойиш эта олди. Стадионда бизни қўллаб-қувватлаган мухлисларимиз жуда кўп эди, уларнинг далдаси бизга катта ёрдам берди. Бу биз учун улкан далда бўлди», — дея бош мураббийнинг сўзларини келтиради ФИФА матбуот хизмати.
Эслатиб ўтамиз, Япония терма жамоаси Тунис устидан 4:0 ҳисобида йирик ғалабага эришди.
«Самурайлар» икки ўйиндан сўнг тўрт очко жамғариб, ўз гуруҳларида иккинчи ўринни эгаллаб туришибди. Учинчи тур доирасида Япония Швеция терма жамоасига қарши майдонга тушади.
