Бразилия терма жамоаси вингери Рафиньянинг тиббий кўрикдан ўтиши унинг сон орқа мушагидан жароҳат олганини тасдиқлади.
Футболчи ЖЧ-2026 гуруҳ босқичи 2-туридан ўрин олган Гаитига қарши учрашувда (3:0) жароҳат орттириб олган эди.
«Шанба куни Рафинья тиббий кўрикдан ўтди ва унда ўнг сон орқа мушаги шикастлангани тасдиқланди. Футболчи имкон қадар қисқа муддатда соғайиб, машғулотлар ва ўйинларга қайтиши учун Бразилия конфедерацияси тиббий штаби назорати остида интенсив даволаниш курсини ўтайди», — дейилади Бразилия футбол конфедерацияси баёнотида.
Globo нашри тарқатган маълумотларга кўра, текширувлар жиддий ҳеч нарсани аниқламаган, бироқ яқин кунларда шифокорлар унинг сонидаги ҳолатни диққат билан кузатиб боришади. Айни дамда жароҳат жойидаги шиш туфайли аниқроқ ташхис қўйиш бироз қийин бўлмоқда.
Бразилия терма жамоаси «Барселона» аъзоси икки ҳафтадан сўнг старт оладиган 1/8 финал босқичи учрашувларига қадар сафга қайта олишига умид қилмоқда.
