Мадриднинг «Реал» клуби собиқ ҳужумчиси Гарет Бэйл италиялик мураббий Карло Анчелоттининг нима учун топ-клубларда муваффақият қозонишга қодирлиги ҳақида ўз фикри билан ўртоқлашди. Анчелотти «қаймоқранглилар»дан ташқари «Милан», «Бавария», «Челси», «Ювентус» ва «ПСЖ» клубларини ҳам бошқарган.

«Карло — шунчаки ажойиб мураббий. У психологияни ва футболчиларга бўладиган босимни жуда яхши тушунади. У ўйинчилар билан шундай муносабат ўрнатадики, улар мураббий ҳақиқатан ҳам ғамхўрлик қилаётганини ҳис қилишади. Баъзан футболчилар яхши спорт формасида бўлишмайди, лекин Карло уларни қандай қўллаб-қувватлашни ва руҳлантиришни билади.

Мадриднинг «Реал»и каби катта клубда футболчиларни шунчаки шуғуллантириш шарт эмас. У ерда эгони бошқара билиш керак. Мана шунинг учун ҳам у энг йирик клубларда бунчалик муваффақиятли ишлаб келмоқда», — дея Бэйлнинг сўзларини келтиради The Athletic.