2026 йилги футбол бўйича жаҳон чемпионатининг "H" гуруҳи 2-туридан ўрин олган Уругвай ва Кабо-Верде терма жамоалари ўртасидаги баҳс якунланди. АҚШнинг Майами шаҳридаги «Хард Рок» стадионида бўлиб ўтган учрашув 2:2 ҳисобидаги дуранг билан тугади.

Ҳисоб 21-дақиқада очилди. Кабо-Верде терма жамоаси ярим ҳимоячиси Кевин Ленини меҳмонларни олдинга олиб чиқди. Уругвайликлар биринчи бўлим охирида вазиятни ўзгартиришга муваффақ бўлишди. Аввалига Максимилиано Араухо 44-дақиқада ҳисобни тенглаштирган бўлса, Агустин Каноббио 45+6-дақиқада жамоасини олдинга олиб чиқди.

Бироқ Кабо-Верде таслим бўлмади. 61-дақиқада Элио Варела гол уриб, якуний ҳисобни ўрнатди — 2:2.

Эслатиб ўтамиз, биринчи турда Уругвай Саудия Арабистони билан 1:1 ҳисобида дуранг ўйнаган эди. Кабо-Верде эса Испаниядан очко тортиб олиб, баҳсни 0:0 ҳисобида якунлаган.

Гуруҳ босқичининг сўнгги, 3-турида Уругвай Испания билан, Кабо-Верде эса Саудия Арабистони билан куч синашади. Ҳар икки учрашув ҳам 27 июнь куни бўлиб ўтади.

Жаҳон чемпионати-2026. H гуруҳи, 2-тур
22 июнь, Майами (АҚШ). «Хард Рок» стадиони
Уругвай — Кабо-Верде — 2:2
Голлар: Ленини, 21 (0:1), Араухо, 44 (1:1), Каноббио, 45+6 (2:1), Варела, 61 (2:2).