Англиялик собиқ ҳужумчи Майкл Оуэн Португалия терма жамоаси ҳужумчиси Криштиану Роналдунинг жаҳон чемпионатидаги ўйини ҳақида ўз фикрлари билан ўртоқлашди.

41 ёшли футболчи гуруҳ босқичининг 1:1 ҳисобида якунланган ДР Конгога қарши биринчи тур учрашувида гол ура олмади.

«Албатта, Мессининг худди шундан сал олдин хет-трик қайд этгани унга ёрдам бермади, аммо мен танқидларга қўшилмайман. Криштиану доимо шундай бўлмаганми? Айниқса, сўнгги йилларда. У ҳеч қачон жамоавий ўйинга фаол жалб қилинмаган, аммо муҳим паллада ҳаммасини ўзгартириб юбориши мумкин эди. Роналду гол урмаганида ҳамма нарсада уни айблаш жуда осон. Аммо у кейинги ўйиннинг ўзидаёқ танқидчиларнинг оғзини неча марта юмган? Агар у Ўзбекистон терма жамоасига қарши ўйинда хет-трик билан жавоб қайтарса, ҳайрон қолмайман», — дея Оуэннинг сўзларини келтиради Goal.

Португалия ва Ўзбекистон терма жамоалари ўртасидаги баҳс 23 июнь куни Тошкент вақти билан соат 22:00'да бўлиб ўтади.