«Спартак» клубининг собиқ футболчиси Валерий Кечинов 2026 йилги жаҳон чемпионатида иштирок этаётган Ўзбекистон терма жамоасининг имкониятлари ҳақида фикр билдирди.

— Ўзбекистон терма жамоасининг жаҳон чемпионатида иштирок этаётгани сизда қандай ҳиссиёт уйғотмоқда?

— Бу ерда икки хил фикр бўлиши мумкин эмас. Ўзбекистон учун бу улкан ютуқ. Бу натижага ҳисса қўшган барча инсонлар мақтовга лойиқ, — деди Кечинов.

Собиқ футболчи терма жамоада етакчилар борлигини тан олган бўлса-да, Ўзбекистоннинг асосий кучи жамоавий ўйин эканини таъкидлади.

— Бу жамоада фақат бир ёки икки нафар футболчини ажратиб кўрсатиш қийин. Ўзбекистоннинг энг катта устунлиги — унинг жамоа сифатида кучли экани. Албатта, Элдор Шомуродов, Аббосбек Файзуллаев ва Абдуқодир Ҳусанов каби етакчилар бор, аммо бошқа иқтидорли футболчилар ҳам етарли, — деди у.

Кечинов Португалия ва Конго ДР учун Ўзбекистонга қарши баҳслар осон кечмаслигига ишонишини билдирди.

— Португалия ва Конго учун Ўзбекистонга қарши ўйинлар енгил сайр бўлмайди. Айниқса, Португалия ҳам бундан мустасно эмас. Ўзбекистон камида португалияликларнинг асабини анча бузиши мумкин, — дея қўшимча қилди собиқ ярим ҳимоячи.