Ўзбекистон миллий терма жамоаси бош мураббийи Фабио Каннаваро Жаҳон чемпионати гуруҳ босқичининг 2-тури доирасида Португалияга қарши кечадиган баҳс олдидан ЎФА матбуот хизматига интервью берди. Италиялик мутахассис рақибнинг кучи, ўйинга танланган режа ва ўзининг мураббийлик фаолияти ҳақида тўхталиб ўтди.

“Ўйинчилардаги босимни туширишга ҳаракат қиляпман”

“Мен футболчиларимдаги босимни камайтиришга ҳаракат қиламан, чунки биз жаҳон чемпионатининг энг кучли жамоаларидан бирига қарши ўйнаймиз. Португалия таркиби юлдузли футболчиларга тўла ва, албатта, уларнинг сафида Криштиану Роналду бор. Сўнгги 20 йил ичида у Лионель Месси билан бир қаторда дунёнинг энг буюк футболчиларидан бири бўлиб келмоқда.

Португалия тўпни назорат қилишни яхши кўради, рақибга босим ўтказиш имконини бермайди. Улар қисқа паслар орқали ўйинни бошқаради ва ҳар қандай вазиятда хавфли ҳисобланади. Шунинг учун ҳимояда ўта тартибли бўлишимиз керак. Шу билан бирга, тўп ўзимизга ўтганда, уларга муаммо туғдиришга ҳаракат қилишимиз лозим”, дейди Каннаваро.

“Майдонда дўст бўлмайсиз”

Мураббийнинг фикрича, ўйинчилар юлдузларга ҳурматни сақлаган ҳолда фақат ўз ишига диққат қаратиши талаб этилади:

“Ҳар бир жамоанинг кучли ва заиф томонлари бўлади. Биз рақибнинг кучли жиҳатларини имкон қадар чеклаб, заиф томонларидан фойдаланишга интилишимиз керак. Ҳа, албатта, Роналду — буюк футболчи ва катта юлдуз, аммо ҳуштак чалиниб ўйин бошлангач, буларнинг барчасини унутиш керак. Биз фақат ўз вазифамизга эътибор қаратишимиз шарт. Майдондан ташқарида футболчилар ўртасидаги муносабатлар жуда яхши бўлиши мумкин, аммо майдонда сиз дўст эмассиз. У ерда фақат ўз жамоангиз манфаатини ўйлашингиз керак бўлади”.

“Биз ҳамма рақибларни ҳурмат қиламиз, аммо...”

Фабио Каннаваро ЖЧ—2026 даги мақсадлар хусусида гапираркан, жамоамиз халқаро майдонда ўзининг ижобий қиёфасини яратишини таъкидлади:

“Умуман олганда, Ўзбекистонни Жаҳон чемпионатида илк бор қатнашаётган, лекин кучли рақиблардан қўрқмайдиган жамоа сифатида эслаб қолишларини истайман. Биз чиройли футбол кўрсатадиган, тўғри шаклланган ва интизомли жамоа сифатида танилишни ният қилганмиз. Шунингдек, барча рақибларни ҳурмат қиламиз ва ўзимизга ҳам шундай ҳурмат билан муносабатда бўлишларини хоҳлаймиз”.

Маълумот учун, Ўзбекистон ҳамда Португалия терма жамоаси ўртасидаги баҳс 23 июнь куни бўлиб ўтади. Учрашув Тошкент вақти билан 22:00 да бошланади.  ​